"كل شخص أقدم على اغتصاب فتاة لم تتم الخامسة عشرة من عمرها يعاقب بالإعدام".
"وتكون العقوبة بالأشغال الشاقة عشرين سنة إذا كانت المجني عليها قد أكملت الخامسة عشرة ولم تكمل الثامنة عشرة من عمرها" .
هدا حكي القانون ، بس بتكون غلطان أذا قلبت الصفحة هاي من قانون العقوبات الأردني بدون ما تطلع على مادة ثانية بتقول: إذا عُقد زواج صحيح بين مرتكب إحدى الجرائم الواردة في هذا الفصل (اغتصابـ،هتك عرض،إغواء..)وبين المعتدي عليها أوقفت الملاحقة. وإذا كان صدر حكم بالقضية علق تنفيذ الحكم على المحكوم عليه.
يعني بالمشرمحي ، إذا واحد اغتصب بنت عمرها اقل من 15 ،المفروض بالقانون عقوبته هي الإعدام ، بس كمان بالقانون بقدر المغتصب انه يتزوج اللي اغتصبها و هيك بتسقط عنه العقوبة . وبلمح البصر ببطل مجرم .
"من واقع أنثى (غير زوجته) بغير رضاها سواء بالإكراه أو التهديد أو بالحيلة أو الخداع عوقب بالأشغال الشاقة المؤقتة مدة لا تقل عن خمسة عشرة سنة" .
هدا بقانون العقوبات ، بس كمان بالقانون إذا اللّي هدد وضرب واحتال وخدع واغتصب أنثى فوق إل 18 سنة، اتزوجها، فكمان هيك ببطل مجرم وبصير عريس !
" الأردنيون أمام القانون سواء لا تمييز بينهم في الحقوق والواجبات وإن اختلفوا في العرق أو اللغة أو الدين." هدا بالقانون بس كمان بالقانون" أولاد الأردني، أردنيون أينما ولدوا ". أولاد الأردنية المتزوجة من أجنبي مش اردنين أينما ولدوا !
يعني بالمشرمحي: إنتي مواطنة أردنية على العين والراس بس ولادك هم ضيوف عليكي وعلى وطنك وما تضايقي كتير إذا انحرموا من أكم حق ، واحمدي الله كل صبح ومسا لأنه وطنك آواهم .
وكمان شغلة : بالله عليكي تستفيدي من الدرس و اتوعي الأردنيات انه قبل ما يسألوا عن اسم العريس والحبيب ياخدو شهيق و زفير و يسألوا المضروب على قلبه بالأول : شو جنسيتك !
